Catro crónicas montrealinas

(Marko Czalic - Montreal)

 

X12. Shakhtar - Tuzaros

Un partido de lixeiro dominio local puña fin a unha longa xeira de resultados negativos no Durruti. O marcador fixo xustiza ao maior número de ocasións dos non-canadianos (2-0).

 

X14. Shakhtar - Asalta

Até seis goleadores diferentes na sublimación do fútbol de ataque ideado por Clemente e, ademais, os montrealinos conseguían o gol 2000 da historia das competicións de clubes da WIFA, aínda que unha dúbida nas contas impídenos polo de agora adxudicalo con certeza a un xogador en concreto (7-1).

 

1/2 Kopa. Volta. Shakhtar - Asalta

Outra vez o Durruti como inimigo. Os quebequenses comezaban coa vantaxe de 1-2 conquerida en Madrid. Moore explicaba o acntecido ao remate: "A Kopa é unha competición moi difícil. Funciona como unha goma elástica, porque as eliminatorias son moi longas. Podes empezar moi ben e baixar logo o ritmo e, cando queres volver ao partido, xa non atopas o punto. No partido de volta faltounos interese na especulación e cometemos erros pontuais moi graves. Isto, ante un equipo sistemático que se nutre das contras é moi perigoso, case suicida. Puidemos pechar a eliminatoria na ida e non o fixemos. De todos os xeitos, con erros e todo, o factor decisivo foi a sorte". Emlyn Hughes tiña outras opinións: "Sempre preferimos contar co noso mediocampo. É unha mágoa cando se ausentan en bloque. Co 0-2 a cousa estaba moi negra. Equilibramos o partido co 1-2, pero era un empate ficticio. O seu seguinte gol pesaba valía máis que o noso e iso foi o que máis pesou". Ao final, 2-4.

 

X16. Shakhtar - P. Clash

Un partido que se presumía tremendamente intenso e abofé que o foi. Un derbi por todo o alto e con todos os condimentos. O Shakhtar comezou mellor e un bo córner de Berti foi cabeceado impecablemente á escadra por Rainer Bonhof, traspasando a presión aos apedreados visitantes. A loita pola LPU6 vivía un dos seus clímax e durante o primeiro tempo do 21º derbi anarquista o vento soprou de costas para os de Montreal. Un erro no saque de Toldo permitiu que a presión de Park e Hleb rematase co balón nos pes do bielorruso, que se escorou cara a esquerda e serviu o centro. Koller rematou dun xeito tan doado como incómodo. O Shakhtar superara ao seu rival en xogo e goles no primeiro acto (2-0). Pero os trocos tácticos os escoceses deron froitos e contra o minuto 55 Gilardino, en acción que repetiría, baixou até a liña de medios dos rivais para servir unha boa apertura a Stoichkov. Os defensas que saíran en persecución do violinista rectificaron tarde ante o centro do búlgaro, que foi cabeceado por Barry Ferguson entrando desde a segunda liña para batir a un desamparado Niemi. O partido do escocés, todo corazón, foi para enmarcar. Pasaron os minutos con igualdade no xogo. A presión no centro do campo dos visitantes equilibrara as cousas e pechaba as opcións dun estrañamente desafortunado Tuncay. No minuto 78 Gilardino repetiu movemento e Stoichkov e Boban, de xeito tremendamente académico, pecharon a xogada (2-2). O empate era un resultado válido para ambos, pero un gol facía unha diferenza descomunal. A agresividade puido ao medo e o Shakhtar, sentindo o empate como derrota ante o desenvolvemento que tivera o partido, buscou tomar de novo a dianteira. Un testarazo de Koller que superou a Toldo foi detido por un defensa xunto ao pau e finalmente foi despexado con apuros. Era o turno do Clash. Cando o partido xa agoniaba, unha entrada de Ribery pola dereita conduciu a un centro moi longo e intelixente ao segundo pau. Stoichkov gañou a acción por alto a Hughes servindo cara o centro da área e o omnipresente Ferguson, gañando a acción a unha defensa descorazonada, rematou de primeiras coa esquerda rebasando a saída desesperada Niemi. O balón tardou unha eternidade en caer e cando rematou de debuxar a parábola un suspiro percorreu a bancada. Marchara fóra por centímetros, deixando aos dous equipos un sabor agridoce e a Pollo e Torpedo, esfregando as mans.

 

	CLASIFICACIÓN LPU6
		X	G	E	P	F	C	P	D
1	Shakhtar de Montreal	15	8	5	2	36	18	29	18
2	Torpedo Zagreb	15	8	4	3	33	19	28	14
3	Partisano Clash	14	6	6	2	22	12	24	10
4	Pollo FC	13	6	6	1	26	19	24	7
5	Gloria y Honor	17	5	9	3	23	23	24	0
6	Asaltacunas FC	16	5	5	6	32	35	20	-3
7	Swazilandia MN	16	4	7	5	25	22	19	3
8	Ordem e Progresso	13	2	7	4	16	23	13	-7
9	Tuzaros de Reiquiabic	14	1	5	8	7	27	8	-20
10	Che Marx Ltd.	15	1	2	12	22	44	5	-22

 

.