O Torpedo aplasta ós seus rivais nas derradeiras xornadas da 1ª volta

(Redacción)

Onte á noite puidemos presenciar a enésima resurrección do Torpedo Zagreb na liga, gañando os dous encontros que disputou, con maior importancia se cabe tratándose de rivais directos. As recentes incorporacións de Dragan Dzajic e Zbigniew Boniek ó clube mostra unha vez máis a abraiante habilidade que ten este clube para fichar. O xa asentado Kanouté tamén fixo un excelente traballo, anotando un triplete nun dos encontros.

Dende a redacción queremos dicir que o feito de que só se fagan crónicas dos partidos cando o equipo sae vencedor é totalmente infundado, e coma moi ben indica a policía política, velaí a o amplo seguimento da final da Kopa da T2 onde o noso clube foi inxustamente derrotado.


Torpedo Zagreb 3 - Che Marx 2

O encontro comeza moi igualado, con ocasións apara ámbalas dúas escadras, mais ía ser o Torpedo o primeiro en golpear. Xenial saque dende o recuncho de Dzajic e testarazo inapelable de Boniek. 1-0 para os locais, que lonxe de botarse atrás segue a presionar e volven mandar o balón ó fondo das mallas. Nesta ocasión é Boniek que fuxe dos seus marcadores pola banda dereita e pon un balón raso para a chegada de Frings. O xermano, logo dun control "mellorable", tírase ó chan e bate a Van der Sar por baixo. Segue a avalancha de ocasións para a nosa escadra e desta volta é Boniek quen mete un castañazo coa perna esquerda que entra polo segundo pao da porta rival. 3-0 e comezan os nervios no Torpedo, dada a súa facilidade para estragar encontros.
Thuram salta cun inimigo non identificado por un balón, ningún dos dous chega, e ó xuiz da contenda dalle por sinalar penalti. En repeticións posteriores, ás que este xornal puido acceder, non se ve en ningures a suposta falta que provoca a pena máxima, pero en fin, o mal xa está feito. Henry, de xeito maxistral anota o penal, cun atinado tiro ó medio. Ós poucos minutos Maldini rouba un balón limpamente e de novo o trencilla inventa unha falta que expulsa ó non-balón-de-ouro italiano. Tocaba xogar con dez o que restaba de partido. O Che comeza a combinar no medio cambio e de súpeto Batistuta solta un mísil dende fóra da área que entra a rentes do pao da meta defendida por Banks. Estamos no minuto 84 e o resultado é de 3-2. E por sorte, nesta ocasión a crónica remata eiquí, o Torpedo resistiu e puido desfrutar da súa segunda vitoria na liga. Torpedo 3 - Che Marx 2.


Ordem e Progresso 2 - Torpedo Zagreb 4

No segundo encontro da noite o Torpedo visitou ós lusitanos do Ordem, coa esperanza de que os bos resultados continuen. As baixas por sanción de Kalazde (relativamente xusta) e Maldini (totalmente inxusta), non eran un bo presaxio, mais aí estaban Robert Kovac e Mertesacker para sacar ó equipo do apuro. O encontro comeza con Dzajic e Boniek correndo coma foguetes polas bandas e de alí en pouco unha internada do polaco (Hail Poland!), que é derrubado por un malvado defensor, da os seus froitos. O capitán Dzajic transforma a pena en gol cun disparo raso á dereita do porteiro. 0-1 para o Torpedo. Pouco despóis, logo dun par de rexeites, Kanouté saca petróleo, e, anticipándose ó gardamallas local, pon o 0-2 no marcador. Xa no segundo tempo, internada do capi pola banda esquerda e preciso centro a Kanouté, que só ten que empurra-lo esférico ó fondo das mallas. Os locais tamén dispuxeron de boas ocasións, e nunha destas Mr. Square remata un bo pase do Káiser, facendo o 1-3. Pero Kanoué aínda quería máis e tras recibir de Boniek anota o seu terceiro gol do encontro: Kanouté the Killer!. 1-4 no marcador, pero aínda non rematara a festa goleadora, xa que o lembradísimo Boban anota o definitivo 2-4 tras un intelixente toque de de Mr. Square.


O Draft

As novas que temos ata o de agora son que será hoxe á noitiña, con Gerd Müller coma gañador do curso de buceo sen bombona. Agardaremos ata mañá para confirmar cal é o xogador que se incorporará á disciplina do Torpedo de cara á segunda volta.