Emoción no ecuador

(Marko Czalic - Montreal)

O ecuador da liga coincide paradoxalmente co momento máis frío da tempada. Pero iso só atmosfericamente, xa que sobre os terreos de xogo a cousa arde tanto que queima. Catro equipos están metidos moi seriamente na loita polo liderado. Os demais debecen polo cambio de rumbo que lles permita aínda soñar co título e poñen moitas esperanzas no mini-draft invernal. Por se isto fose pouco, xa cheira a Kopa. E, non menos importante, un bo feixe de clubes deben afrontar crises económicas como nunca se viron na historia da WIFA. Gañar na casa é o obxectivo de todos, mentres a ecuatorial clasificación económica ameaza seriamente a estabilidade de non poucos planteis.

	CLASIFICACIÓN T3
		X	G	E	P	F	C	P	D
1	Shakhtar de Montreal	5	5	0	0	21	7	15	14
2	Gloria y Honor	6	4	2	0	13	2	14	11
3	Asaltacunas FC	8	4	2	2	18	14	14	4
4	Partisano Clash	6	4	0	2	10	8	12	2
5	Pollo FC	5	2	1	2	11	9	7	2
6	Swazilandia BP	6	1	2	3	5	8	5	-3
7	Torpedo de Zagreb	5	1	1	3	8	13	4	-5
8	Ordem e Progresso	6	1	1	4	7	15	4	-8
9	Che Marx	7	0	1	6	2	19	1	-17

Restan, pois, 10 partidos para que conclúa a primeira volta. Grandes oportunidades para uns e derradeiras para outros. Catro destes partidos fican, polo momento, aprazados sen data. Os restantes son:

X6. Partisano Clash-Torpedo de Zagreb

Unha loita xa clásica. Os anarquistas, regulares e serios sempre, mídense ao glorioso Torpedo, que defende a causa do Pobo 'a monte', mesturando historicamente soberbias actuacións con inmensos batacazos. P. Clash persigue consolidar a súa boa traxectoria coas miras postas no decisivo derby da X9 ante o Shakhtar. O glorioso Torpedo tenta refrendar o seu inicio de remontada cun novo trunfo que lles dea perspectivas de acadar o ecuador con 13 puntos. E superar a decepción de que o Torpedo non encaixe no Torpedo (o que, por outra banda, semella lóxico).

X7. Shakhtar de Montreal-Gloria y Honor

Unha loita xa clásica. Os anarquistas, desordeados e algo azarosos ás veces, buscan manter o pleno de vitorias fronte ao seu maior rival da tempada até a data, o poderoso G&H, tamén invicto, que ven de recuperar con grande orgullo o primeiro posto na C.E. provisional. Só 2 goles encaixados polo criticadísimo Schmaikel, que o fan polo de agora candidato único ao premio Given, e 21 anotados polos negroavermellados son o preludio do, en teoría, partido grande da xornada. O pronóstico é imposible.

X7. Torpedo de Zagreb-Che Marx

Aparentemente envolto nunha crise interna chega a este partido o espectacular e luxoso plantel do Che Marx. Pero a besta durmida por excelencia do fútbol mundial pode escoller calquera día para empezar a desempreguizarse. E xa sabedes que os postres lácteos non son iogures.

X8. Gloria y Honor-Pollo FC

Unha loita xa clásica. O partido máis repetido da historia oficial da WIFA. A tempada do Pollo resúmese así: inenarrable o acontecido, imprevisible o por acontecer, zlatánico todo -este ano en versión cocha. O equipo do presidente chega con fame e necesidade de recuncar na vitoria tras dunha breve crise. Unha vitoria que o devolva á loita pola liga. O rival eliminouno dúas veces na Kopa, pero se hai un equipo ao que non só non lle importan as estatísticas, senón que inda limpa o cu con elas, ese é, evidentemente, o mellor equipo do mundo. Nos corazóns dos siareiros, sempre Pollo.

X9. Shakhtar de Montreal-Partisano Clash

Unha loita xa clásica. O partido máis repetido da historia oficial da WIFA. O derby dos derbys. Como destes equipos xa se falou, aí queda a cousa polo de agora.

Asaltacunas FC: rematada xa a súa primeira volta, acadado o gol 100 histórico (o 2-0 de Weah no 3-3 ante OeP), o campión, tras unha recuperación tan espectacular como necesaria, agarda resultados satisfactorios co seu aprezable botín de 14 puntos.

Swazilandia BP: bo xogo, excelente defensa, pésimos resultados. Os oscuriños teñen na súa man o asalto á elite, que necesariamente debe vir da contundencia da súa dianteira, curiosamente inexistente. Chegar ao ecuador con 11 puntos é inexcusable para estar ao nivel do xogo amosado. A mentalidade gañadora ou, máis ben, trituradora, será a chave.

Ordem e Progresso: cun plantel carismático e poderoso, mestura de xermanos e tulipáns (son miscibles?), os lusificados pagaron a súa longa inactividade vacacional. Tras un inicio moi prometedor, o seu xogo tornouse un chisco disperso e a crise aconómica anda ó axexo. Pero o seu programado staff invernal debe ter efectos espectaculares. É coñecido o enorme potencial de OeP e tamén moi lembrada a súa segunda volta da LPU2.