INFORME "DUPLO A"

(Marko Czalic - Montreal)

O home que desvelou a escura trama Boban-Charlton; o Home que atopou e fixo públicos os pergamiños da T1; O HOME que sostivo o pulso co entrañable Andriy Shevchenko; o mellor reporteiro da Historia, traballando sempre para vostedes, da un paso máis atando todos os cabos sobre a última e maior polémica da WIFA. Ante vostedes, a pura verdade. O Informe "Duplo A".

É preciso comezar lembrando como, hai xa algún tempo, G&H publicou un estrano comunicado avogando pola modernidade e un estilo máis 'guai'. Esta nova pasou relativamente desapercibida para case todo o mundo, envolta nun halo de simple estratexia comercial. Pero este redactor foi consciente desde o inicio da clara relación entre esta iniciativa e a chegada, en torno a esa época, dun novo equipo directivo ao clube do nobre Sir Nigel. Este equipo directivo estaba encabezado por A.A., xenro dun ex-presidente de monarquía plataneira con importantes relacións nos máis altos circuitos empresariais de poder. As manobras de A.A. permaneceron desde entón nun segundo plano e aquilo, inesperado nun clube de fondo apego ás tradicións, quedou como se dixo nun suceso illado. Até agora.

Todos lembran o fondo impacto do recente anuncio da retirada de G&H das competicións oficiais WIFA. As investigacións deste cronista levárono a descubrir que esta iniciativa partiu de A.A.; "un gilipollas" ou "un memo integral" son as definicións que deste personaxe fan persoeiros históricos do clube. A realidade é que esta retirada, recomendada sibilinamente ao ancián Sir Nigel amparándose en razóns do máis estrano, non era máis que outro truco de márketing vencellado cunha xuntanza entre A.A. e o presidente da WIFA. Ao descubrirse a exstencia desta xuntanza e pedir Sir Nigel explicacións xurdiu a tapadeira "Boicot ao Pollo", segundo a que o Presidente da WIFA era vetado neste noso Xornal. Mentira. O verdadeiro contido da xuntanza foi o encargo de A.A. ao presidente da WIFA, coñecido polo seu gusto artístico, do deseño de novas equipacións para G&H, probablemente, estremo sen confirmar, incluindo o fucsia e cores fosforescentes en grande cantidade. O obxectivo sería desdicirse da retirada no momento que o mercado sinalase como óptimo e forrarse a conta das ventas das novas equipacións. Pero o obxectivo de fondo da manobra de duplo A sería provocar un síncope a Sir Nigel e a súa morte instantánea.

Pero isto non remata aquí. Todo o que coñece a A.A. sabe que non é quen nin de aprender as normas do parchís. Moito menos de montar esta espectacular conspiración. A.A. non é máis que o monicreque dun personaxe maquiavélico e brillante. Adiviñan quen é?

Non, señores. Non estamos a falar do tenente Michael Ballack; tampouco do seu 'alter ego', o Señor Vlad Tepes, ou Vlad II. O auténtico "home na sombra" deste Golpe de Estado en G&H é... o propio Sir Nigel!!

O propio Sir Nigel, que preparou todo metodicamente para reforzar o seu poder interno; o propio Sir Nigel, que buscaba medrar aínda máis dentro da WIFA; o propio Sir Nigel que, curtando a cabeza de A.A. pretendía deixar ao descuberto só unha parte do complot para saír fortalecido; o propio Sir Nigel, que mesmo, por un momento, chegou a pensar que o do fucsia non era tan mala idea e que igual lle conviña máis deixar trunfar o Golpe de Estado e sucederse a si mesmo cun estilo máis 'guai'.

Todo fica sobre a mesa, por fin, por obra, arte e maxia, unha vez máis, de Marko Czalic. Como sobre a mesa esperamos ver pronto a cabeza de A.A. Marko Czalic, que contou desta volta coa axuda de Alan Moore e os espíritos de seu castelo.

Unímonos agora a un desexo unánime. Ver a G&H de volta nas competicións oficiais WIFA e, a poder ser, de rigoroso e solemne NEGRO.