Marko responde

(Marko Czalic - Montreal)

Hai xa ben tempo (na T2!) que o Xornal do Pobo abriu a sección 'Pregúntalle a Marko', destinada a facerlle ao grande Czalic preguntas sobre diferentes apartados estatísticos da historia Wífica. O magnetismo do personaxe é tal que moitas destas preguntas ficaron soterradas baixo moreas de declaracións de amor chegadas desde todos os puntos do cosmos. Así e todo, algunhas destas cuestións foron rescatadas con dificultade pola ex-estrela do Soviet Supremo de Kiev e megaestrela (frustrada polo favoritismo pro-serbio instaurado no seo da federación) da selección iugoslava. Velaquí un breve compendio de respostas para os fans. Quedamos abertos a calquera nova consideración que queiran facer os nosos lectores.

Aforramos as louvanzas que acompañan aos textos e imos directamente coas preguntas.

Que xogador anotou máis goles nun partido oficial de clubes da WIFA?
Esta cuestión, unha das primeiras cronoloxicamente, é tamén das máis complicadas. Ningún xogador, dacordo co que atopamos na documentación, logrou nunca 5 goles nun encontro. Francesco Totti, xogando para o Pollo FC, foi o primeiro autor dun tetra-brick. Non podemos afirmalo con certeza, mais cremos que Eusébio, xogando coa única camisola que coñeceu, a de Gloria y Honor, igualou ao italiano algún tempo despois. Esta tempada 8, curiosamente, malia ser a máis baixa en media goleadora, sumou até tres novos nomes á lista: Kaka e Villa acadaron tamén cadanseus 4 goles nun mesmo encontro, xogando ambos para o caótico Análisis Matemático e tamén outro Pollo, o grande Freddie Ljungberg, segundo a oportuna achega do noso Statsekretär. Curioso tamén é o feito de que dos 5 futbolisas nomeados, 4 non son goleadores particularmente habituais, non sendo tampouco mentira que Villa vén de debutar (e xa pasou por 2 clubes!). En calquera caso, solicítase colaboración cidadá para completar posibles erros ou omisións na presente información.

Cantas eliminatorias kopeiras se resolveron nos penaltis?
Pois 4, e as 4 esta tempada. E as 4, na Kopa do Pollo, polo que a Kopa é virxe aínda neste eido. Son poucas, despois de 107 duelos e 12 competicións kopeiras que se acumulan xa na historia. A primeira desputárona P. Clash e Análisis, con 5-3 para os escoceses tras remataren o encontro con 1 a 1. Curiosamente foi despois cando o Monte Alto Gunners se sumou a esta historia de xeito espectacular sumando un trunfo por 4-2 fornte a Tuzaros (0-0) nos dezaseisavos e, xusto a continuación, un 5 a 4 ante Ordem (2-2), nos oitavos. Lémbranos o Duque que na quenda de semifinais, Gloria derrotou precisamente ao seu equipo por 4-1 nesta sorte tras finalizar con 1 a 1 o tempo de xogo. Once competicións kopeiras sen unha soa tanda de penaltis e chegamos a ver 4 en só 11 partidos da KP8.

A malleira máis gorda.
Shakhtar 7-0 Pollo, na T5. Iso si, o Pollo rematou 4º e os quebequenses, 6ºs. Así é a LPU.

O mellor colista.
Aquí temos boas novas. O mellor colista fora desde sempre o Swazilandia BP -agora MAG- da T1, con 14 puntos en 18 partidos. Pase o que pase no que resta, a T8 verá caer un dos récords máis antigos da WIFA. Pollo ou Tuzaros serán os afortunados.

A maior xeira de vitorias consecutivas na LPU.
A pregunta máis recente e tamén un récord que vén de caer -que foi, precisamente, o que motivou a pregunta-. Efectivamente, as 8 vitorias que o Shakhtar acumula nesta segunda volta da LPU8 consitúen o novo récord. Veremos se se detén ou se amplía. Até o de agora o Gloria y Honor da T4, subcampión ese ano, e o brutal Partisano Clash da pasada T7 ostentaban a mellor marca, con 6 trunfos seguidos.

Canto leva sen perder fóra da casa o Partisano Clash?
Pregunta que chega directiña desde Caldback a Montreal, acompañada de ameazas de morte e acusacións de comunista, entre outras máis desagradables. Queridos camaradas de Caldback, comunista si, pero eu son do Torpedo. Así que amigos, OK? Pois nada menos que desde a X18 e derradeira da T5, cando os escoceses caeron fulminados por 1-0 en Sierra Maestra fronte aos Babudos (daquela Che Marx). Nin en Liga nin en Kopa voltaron nunca máis os de Caldback de baleiro. Na T6, 3 vitorias, 6 empates en liga e un trunfo 0-1 en Montreal no único encontro de Kopa desputado, en cuartos de final. Na T7, pleno total de vitorias na LPU (10!!) e un único empate (1-1) en Kopa, en oitavos e de novo en Sierra Maestra. Nesta T8 que remata, os escoceses deben facer aínda 4 viaxes máis. Pero, polo de agora, acumulan 5 trunfos fóra da casa e 3 empates en Liga e un empate (0-0 en Tron) e unha vitoria (1-4 en Sierra Maestra) en oitavos e cuartos da Kopa, respectivamente. Totalizan, xa que logo, a asombrosa cifra de 31 partidos e case tres tempadas completas sen caer fóra da casa, con 20 vitorias e 11 empates e unha cifra de saqueo superior aos 30 rublos.

Isto e todo polo momento. Agardamos colaboracións, felicitacións, agradecementos e mesmo novas preguntas. Sempre seu, o grande Czalic.
.