(Redacción)
Podémolo confirmar de xeito oficial, dous estremos esquerdos faranse cargo do Torpedo. O Comité, amais de da-los seus nomes tamén engadíu: 'Está claro que ideoloxicamente esta posición é a mellor para o Pobo'. Posteriormente, xa en rolda de prensa, os dous elixidos, Dragan Dzajic e Marko Czalic, contestaron ás preguntas dos medios.
Sr. Dzajic, outra vez no Torpedo?Si. Non ten nada de estrano. É a miña casa. Cando non me precisan marcho a seguir co meu libro e despois volvo outra vez.
Sr. Czalic, que supón para vostede este nomeamento?Ben, en realidade non é máis que medio nomeamento, así que resulta medio satisfactorio e estou medio orgulloso. Falando máis en serio estoulle moi contento. Fun un grande xornalista, seguramente o mellor. Pero xa era o momento de voltar á acción, e onde mellor que na casa.
Sorprendeuno, Sr. Czalic?Si, en certa medida. Debo recoñecer que non agardaba unha noticia tan boa, cando menos non tan cedo. Pero é certo tamén que xa saíran en prensa certas insinuacións por parte de xornalistas de grande prestixio sobre que esta sería a decisión máis axeitada.
Sr. Czalic, que supón para vostede compartir o cargo con Dragan Dzajic, o xogador co que desputou e perdeu a titularidade na selección iugoslava de hai unhas décadas? Síntese de novo o seu suplente?É vostede moi incisivo, si señor. Realmente dá gusto tratar con xornalistas, xa esquecera o que era isto. Como xa expliquei máis dunha vez, a titularidade perpetua de Dragan dentro daquel equipo tivo máis que ver co favoritismo pro-serbio instaurado na federación que cunha cuestión de calidade. É certo que Dragan é un futbolista sensacional, pero eu tiña máis gol. E logo houbo outras cuestións bastante feas... os xornalistas da época aproveitaban que eu xogaba fóra, no Soviet Supremo de Kiev, para difamarme. Dicíase que na URSS o comunismo era algo "frívolo" e que mesmo, nalgunha ocasión, chegaramos a cobrar por pousar para un calendario. Barbaridades, xa ve. Cousas de xornalistas. O tema da suplencia pertence ao pasado; o presente veu poñer á fin as cousas no rego. Dzajic e máis eu levaremos unha relación fluída sempre e cando el acerte nos seus puntos de vista.
Sr. Dragan, Que opina do seu compañeiro no cargo?Eu sempre me levei ben con el, mais penso que el comingo non tanto. Sempre tivo a teoría de que na selección eu xogaba por ser serbio. Xa non se lembra das cheas que collía antes dos encontros. Mais todo iso é o pasado, agora o único que importa é o Torpedo
Por que marchou este verán, quere falar do tema?Cuestións tácticas. A miña limitación como futbolista é que só sei xogar de estremo. Se o adestrador opta por non empregar esta posición no debuxo táctico fai que a miña presenza non sexa necesaria.
Sr. Czalic, quen o substituirá a vostede na correspondencia en Montreal?Elle unha cuestión que descoñezo e secundaria, ademais. Bastante tempo se me malgastou alí morto de frío; para min é unha cuestión que poden encargar a calquera bolseiro, ou que busquen ex-xogadores do Shakhtar. A miña prioridade agora é voltar ao Pobo para servir ao Pobo e sacar ao equipo do foxo onde se meteu por algunhas decisións, digamos, ehem, desafortunadas. Desafortunadas no sentido de que houbo mala sorte con elas, claro; o traballo dos comités é sempre excelente, o de todos os comités. Non hai máis que ver a decisión que veñen de tomar.
Pero é certo que, en Montreal e todo, é dicir, enviado ao cú do mundo, a súa megalomanía non lle impediu facerse cargo de grande parte da cobertura global da LPU para o Xornal. Que asumirá agora a tarefa?É certo que me encanta a música. Polo demais, procurarei co meu traballo que o Torpedo estea no centro de todas as conversas até tal punto que falar do Torpedo e falar da LPU sexa o mesmo. E problema resolto.
Sr. Dragan, quen será o capitán do equipo?Aínda temos que falar cos xogadores. Boniek sería a primeira opción, aínda que está un pouco canso de ser o centro de atención mediático do clube. Senón, Banks é un excelente candidato. De calquera xeito, quizáis o mellor é que os xogadores escollan quen os quere representar.
Sr. Czalic, contento de voltar á terriña, daquela?Home...! En Montreal vese fútbol aceptable e de prognóstico incerto, pero o Torpedo só vai unha vez ao ano. Polo demais fai un frío demencial e o concepto que teñen alí da "esquerda" é algo laxo. Non nego que algunha vez eu mesmo me deixei levar por ese espírito. Pero rematou o tempo da embriaguez continua. Para min e para o Torpedo, chegou o tempo dos callos.
Sr. Dragan, pensa en voltar ós terreos coma xogador? Entra vostede nos planes do equipo que adestra?Esta pregunta parece feita para Mitea. No comment.
Sr. Czalic, para a revista especializada "Papeles de fútbol cúbico". Expláiese: Proxecto deportivo e plans tácticos.Ben, o meu proxecto de futuro -é dicir, cun draft que me permitise reconfigurar o plantel- para o Torpedo sería, máis ou menos, este: Van Bommel e Stankovic fóra. Novo medio do campo. Isto ten que ver máis co desgaste e os "vicios adquiridos" na sala de máquinas que con calquera outra consideración. O Torpedo, pola súa idiosincrasia, debe sacar toda idea táctica como consecuencia do que decida facer no medio. E o seu plan táctico actual sería este: 4-4-2. Banks, dous laterais ofensivos o esquerdo podería ser o propio Zhirkov e o dereito quizais Salihamidzic. Dous centrais de moito nivel (Chivu, Kaladze, Campbell, calquera parella deles), recuperar a Emerson para o CCD e xogar, ben con outro CCD, ben cun CC completo e de categoría, a poder ser grande e carismático, con dotes artísticas, que xogaría un chisco máis adiantado e lixeiramente caído á esquerda. Un CLT dereito, veloz e incisivo. Gústame Poborski, pero válenme outros. Un mediapunta, Boniek. Penso que Boniek é bo abondo como para que no canto de xogar o equipo para el, xogue el para/por todo o equipo. Un estremo esquerdo, claro, posición fundamental nisto do fútbol e que hai que ter sempre ben cuberta, que en principio debería ser Dragan Dzajic, dado que Marko Czalic está retirado. E un dianteiro centro. Non teño preferencias neste apartado, mais vexo con bos ollos a Iaquinta. O esencial dos dianteiros do teu equipo non é a súa calidade, senón coñecelos ben. Saber exactamente que podes agardar deles, en que son fiables, porque iso che facilita moito as cousas ante a grande pregunta: que tipo de balóns nos interesa facerlles chegar aos nosos dianteiros? E a resposta é clara: aqueles para os que teñan as características óptimas para garantir que lles darán boa saída. Ah, e outra cousa. Considero imprescindible a Luka Modric, como suplente de calquera dos postos ofensivos do mediocampo pola súa capacidade para dar circulación á bola. Un último detalle: creo que o Torpedo NECESITA unha defensa adiantada. O balón ten que ser sempre, todo o partido, do Torpedo. Pero isto non é máis que un pequeno esbozo. Polo momento non quero dar nomes nin pormenorizar conceptos para non poñer nerviosa á xente. De momento traballaremos co que hai e, se as cousas non van ben, seguro que os comités todos verían con bos ollos algunha que outra purga.
Sr. Dragan, comparte esta visión?No esencial si, mais non por exemplo no que di de Emerson. van Bommel está a xogar moi ben, e ter fichar a Emerson para telo de suplente non ter sentido. Sobre o CC grande con dotes artísticas... A verdade é que a curto prazo véxoo difícil. No ataque, Marko fala moi ben de Iaquinta, mais eu non me vou prounciar aínda sobre o asunto do dianteiro. Estamos a agardar que a canteira volva dar un 'quiller' coma Vladic.
E logo Zedric?Non me acaba de convencer. Terá as súas oportunidades, mais non o vexo no equipo de aquí a un par de anos. De calquera xeito aínda é moi novo, e pode progresar. A ver onde chega.
Obxectivos?Vitoria suma. Títulos. Xa non temos gana de rir máis.
