Alen Boksic ó Torpedo!

Alen Boksic no adestramento de hoxe, coa 2ª equipación do Torpedo

(Redacción)

Mitea anunciou hoxe á mañanciña a fichaxe para a 2ª volta do lendario dianteiro croata Alen Boksic, curmán de Rapajk, presidente do clube. Unha morea de xente acudiu ós campos de adestramento para ve-las evolucións do xenial futbolista, que malia o tempo que leva fóra dos terreos de xogo parece en boa forma.

Posteriormente, saiu en rolda de prensa xunto a Mitea. "É unha grande honra para min estar aquí, agardo impaciente que comece a segunda volta para poder demostrar que son o dianteiro que precisa o Torpedo". "Se somos compatibles Kanouté e mais eu? Penso que si, pero estas cuestións as terá que responder o míster". Por outra banda Mita dixo que "Vai marcar un feixe de goles, xa veredes". Boniek tamén falou "Esta fichaxe é un golpe nos fuciños do capitalismo, como é evidente. A revolución proletaria segue o seu camiño, e con Alen xogando connosco vai ser todo máis sinxelo".

Milan Rapaic, si, o que xoga, non o presidente, tamén quixo dicir que "Que ben poderlle dar pases de gol de novo. Aínda que bueno a verdade é que esto é un pouco coñazo. En realidade todo é un pouco coñazo". "Que balcánico son...", continuou despois de ficar en silencio un bo anaco.