Lloris recolle as luvas

Rudi Völler abriu o marcador no Chanel ante os Babudos ao pouco de iniciar o encontro, cos locais volcados sobre un excelente Casillas. O partido decantábase para os locais claramente, pero o arqueiro babudo mantivo o tipo todo o encontro, mentres os seus compañeiros equilibraban progresivamente o xogo. Nos minutos finais rozaron o empate, pero respondeu Lloris e, nos derradeiros intres, Völler sentenciou cun gran pase de Hamsik (2-0).

No Durruti, a estrea do Rif resultou inicialmente algo penosa, con moitos regalos da defensa a Stoichkov, que este devolveu puntualmente. Por fin, nunha xogada elaborada, un defensor ganlleiro acadou a súa propia liña de fondo e enviou o pase da morte cara a frontal. Abidal saltou por riba da bola, para deixarlla en posición franca a Hristo, que desta volta controlou e anotou axustado coa perna dereita. Pero o Shakhtar non estaba a xogar ben, e un disparo inocente de Keita rematou en golazo. No desconto do primeiro tempo, Di Stéfano apañou un rexeitamento e colocou o 1-2. Don Pedro sentenciou cunha das clásicas contras dun Rif correoso no segundo tempo (1-3).

En Sierra Maestra, o Rif controlou de inicio a uns Babudos moi ben plantados, que chegaron a dominar boa parte do segundo período e perdoaron as súas opcións. Casillas salvou finalmente o empate, nunha nova acción de mérito (0-0).

De volta en Londres, nun partido a vida ou morte para o Shakhtar, viuse bo xogo e ocasións para ambos bandos. No entorno do descanso, tanto antes como despois, o Shakhtar intensificou o seu dominio, aínda que a defensa tuzareña forzaba aos dianteiros no remate. Nedved estivo particularmente desafortunado nesa disciplina e Lloris, máis que seguro. Unha contra local rematou con gol de Bican. O Shakhtar buscou o empate até o final, pero un erro defensivo permitiu a Völler anotar na última xogada, con resultado de morte (2-0).

Sierra Maestra, outra vez: Conti asiste a Garrincha quen, a un toque de reviravolta, anota un golazo. Reacción inmediata do River: Rooney para Ribery, que iguala. Xogada individual a trompicóns de Lampard, que remata co balón na frontal e anota. Rooney recibe a 25 metros e dispara raso, potente e axustado e bate a un Casillas algo desubicado. O resultado ao descanso foi tamén o final (1-3).

Co pulo da súa primeira vitoria, os fluviais reciben aos Tuzaros. Dominan, disparan, erran, topan con Lloris. No minuto 78, Bican penetra pola esquerda e cede atrás. O balón dá en Zanetti, toca en Peruzzi que non pode reter, peta no poste, pasea sobre a liña, Peruzzi mete as luvas... gol. Os de Viqui non dispararon, nin dentro nin fóra, en todo o partido (0-1).

Así, os Tuzaros asinan un arranque espectacular e afortunado e miran xa con ambición ao liderato. O Rif comeza sólido, pero haberá que velo máis. O Shakhtar fica algo máis que tocado, malia que as sensacións de xogo non son tan malas. Os babudos, case afundidos. Se só van meter golazos, terán que facelos máis decote. O River logrou a primeira vitoria e segue a dar moi boas sensacións co seu xogo, pero permanece na parte baixa.