Mitea, novo adestrador do Torpedo

(Redacción)

Tra-lo descalabro da primeira volta (4 puntos), o Comité Para Procurar Solucións Ós Descalabros (C.P.P.S.O.D), decidíu que era tempo de buscar un adestrador que reflotara ó noso clube. O escollido foi Nicolae Mitea, vello coñecido do Pobo.

A súa traxectoria coma adestrador-xogador foi irregular. Por unha banda é certo que foi un dos definidores do estilo torpedil, mais en canto a éxitos deportivos, un fracaso. Nembargantes, nestes tempos escuros, quizáis as súas ideas sexan o mellor para recuperares o nivel do equipo.

Boniek, o adestrador saínte non viu con malos ollos o seu cese. 'Eu faría o mesmo. Isto é un desastre. Mitea é un home da casa, que coñece ben o clube e trae unhas ideas tácticas innovadoras. A ver se nos vai ben así."

Mitea tomou posesión do cargo para o draft de inverno. E montouse unha boa. Coma primeira medida, a cesión de Boniek en subasta pública. Este feito sen precedentes fixo que certos sectores da poboación mostraran o seu enfado, aínda que puideron ser reprimidos sen moitos problemas pola Policía Política. De seguro que este colectivo estaba baixo o mando de intereses corporativos que, coma sempre, tentan afundir ó Pobo.

O Asaltacunas foi o destino de Boniek, que á sua vez entregaron un fardo do que saía unha voz que dicía: "Soy un ganador nato. Déjenme salir, soy la estrella de (inintelixible). Ajuda!". Os traballadores do servizo de transportes botárono ó Adriático.

Entrementres, Dzajic sufríu o mesmo destino, aínda que neste caso, Mitea dixo: 'É unha mágoa que só xogue de estremo, se quixera adaptarse a outras posicións contaría con el". Tamén lle adicou unhas verbas a Zambrotta, fichado polo MAG: 'Oiches? Fóra!'

Isto implicou a chegada de novos xogadores: Tim Borowski, que xa estivera no noso clube e foi moi ben recibido polos siareiros; un rapaz belga chamado Mexes, que seica é moi bo central; John Barnes, non precisa comentarios; e Kevin Keegan, un inglés que promete moito mais vese que lle faltan encontros. Mitea xa lle deixou as cousas clariñas 'Ou espabilas ou vas facerlle compañía ós muxes'.