Limpando o chan

(Redacción)

Chegan á nosa redacción novas fresquiñas dende o Estadio do Pobo. De xeito exclusivo, este xornal conseguiu a lista de xogadores que estarán no novo proxecto quinquenal do noso clube. Hai unha boa trama, sorpresas, emoción, e un final incrible.

Xa nos dixera Boniek hai ben pouco que habería unha boa purga, e varios xogadores, que segundo parece que se tiñan por máis importantes da causa do Pobo, serían expulsados da nosa fermosa cidade.

Xogadores que están camiño da fronteira, atados e amordazados:

Emerson : O sentir dos seareiros e do propio clube é dun fondo pesar. Este excelente xogador e mellor persoa foi un dos inocentes perxudicados de toda purga que se precie. "Botarémolo moito en falta" dixo Banks esta semana, " sempre tiña unha palabra de ánimo cando as cousas non marchaban ben".

Maldini : Andaba moi crecido. Vaille vir moi ben unha pequena cura de humildade. Falta de madurez, seguramente.

Chivu : O mes anterior esixiu cartos. Si, si, diñeiro, esos papeis que son coma as cartillas. O clube non podía pasar por alto esta afrenta, e agora está no río, xunta os peixes. Seguro que se han de levar ben.

Rapaic : Ninguén o botou, decidiu marchar "E que xa estaba un pouco canso de todo, sabe?" dixo mentres recollía as súas cousas. Ninguén o viu dende entón.

Ballack 'The Painter' : Pese á súa aportación cultural/artística, estes artistas son coma veletas. Agora di que vai facer un 'happening' en Groenlandia, que consiste en "poñerlles cucuruchos ós montes de xeo e logo mirar cara o outro lado". Agardamos noticias.

E hai máis, non vaian crer que Thuram está lesionado ou que Dzajic ten problemas intestinais. A continuación, en pouco tempo.


PUBLICIDADE:

EN POUCOS DIAS, CON ESTE XORNAL, O SUPLEMENTO ESPECIAL QUE TODO O MUNDO AGARDABA: PROXECTO PLANTEIS 6